“Ölkəmizi tanıyaq” tur aksiyası çərçivəsində Nizami rayon məktəbliləri Naxçıvan şəhərinə yola salınıblar

Azərbaycan Respublikasının Prezidenti cənab İlham Əliyevin tapşırığına əsasən respublikamızda “Ölkəmizi tanıyaq” devizi ilə maarifləndirici tur-aksiyaları keçirilir.

23 mart 2019-cu il tarixində “Ölkəmizi tanıyaq” tur aksiyası çərçivəsində rayon məktəblilərinin Naxçıvan şəhərinə yolasalınma mərasimi keçirilib.

İlk öncə rayon rəhbərliyi, təhsil işçiləri, valideynlər və tur-aksiya iştirakçıları Rayon İcra Hakimiyyətinin inzibati binasında ümummilli lider Heydər Əliyevin büstü önündə xatirəsini yad ediblər.

Nizami Rayon İcra Hakimiyyətinin başçısı Arif Qasımov çıxış edərək, xalqımızın gələcəyi olan uşaqlara göstərilən dövlət qayğısından, gənc nəslin hərtərəfli inkişafı üçün yaradılan şəraitdən söz açıb. “Ölkəmizi tanıyaq” tur-aksiyasının əhəmiyyətindən danışan A.Qasımov turun keçirilməsində əsas məqsədin gənc nəslin Vətənə, tariximizə, mədəniyyətimizə, milli adət-ənənələrimizə hörmət və məhəbbət ruhunda tərbiyə edilməsi olduğunu  diqqətə çatdırıb və  tur-aksiya iştirakçılarına uğurlu yol diləyib.

Sonra çıxış edən Nizami Rayon İcra Hakimiyyəti başçısının müavini Gülnaz İsrafilova tur-aksiyalar çərçivəsində şagirdlərin ölkəmizin müxtəlif bölgələrinin müasir həyatı, tarixi, mədəni irsi, adət-ənənələri, özünəməxsus xüsusiyyətləri, ümummilli lider Heydər Əliyevin qurub-yaratdığı müstəqil Azərbaycanın nailiyyətləri ilə yaxından tanış olacaqlarını bildirərək, şagirdlərin dünyağörüşlərinin daha da zənginləşməsində turların mühüm əhəmiyyət  daşıdığını diqqətə çatdırıb.

Yolasalma mərasimində şagird və valideynlər də çıxış edərək, gənc nəslin fiziki, mənəvi-psixoloji cəhətdən sağlam yetişməsi, onların savadlı və vətənpərvər böyüməsi istiqamətində görülən işlərə, həmçinin doğma Azərbaycanın ayrı-ayrı guşələrinin gənc nəslə daha yaxından tanıdılması məqsədilə reallaşdırılan tur-aksiyaların təşkilinə görə ölkə başçısına minnətdarlıqlarını bildiriblər.

Yolasalma mərasimi 3 nömrəli Uşaq-Gənclər İnkişaf Mərkəzinin təqdim etdiyi konsert proqramı ilə davam edib.

Sonra şagirdlər onlar üçün ayrılmış avtobusla Heydər Əliyev Beynəlxalq Hava Limanına yola düşüblər. 

Heydər Əliyev Beynəlxalq Hava Limanında Naxçıvan şəhərinə gedən şagirdlər Nizami Rayon Mədəniyyət Mərkəzinin Novruz bayramı münasibətilə təşkil etdiyi konsert proqramını izləyiblər. Novruzun rəmzləri olan Bahar qızı, Kosa və Keçəl, həmçinin rəqs qrupları məktəblilərdə xoş əhval-ruhiyyə yaradıb.

Sonra tur-aksiya iştirakçıları Heydər Əliyev Beynəlxalq Aeroportundan Naxçıvana yola düşüblər.

Qeyd edək ki, həmin gün Naxçıvandan gələn tur-aksiya iştirakçıları da bayram əhval-ruhiyyəsi ilə qarşılanıblar.