Beynəlxalq Ahıllar Günü münasibətilə ahıllar arasında stolüstü oyunlar təşkil edilmişdir.

01 oktyabr 2013-cü il tarixində Nizami Rayon İcra Hakimiyyətinin təşkilatçılığı ilə Heydər bağı park-bulvarda Beynəlxalq Ahıllar Günü münasibətilə ahıllar arasında stolüstü oyunlar təşkil edilmişdir.
Tədbiri giriş sözü ilə Rayon İcra Hakimiyyəti başçısının müavini Gülnaz İsrafilova açaraq, ilk öncə rayon rəhbərliyi adından ahılları Beynəlxalq Ahıllar Günü münasibətilə təbrik etdi. O, 1992-ci ildə ahılların müdafiəsi ilə bağlı BMT-nin Baş Məclisinin Qətnamə qəbul etdiyini bildirərək, respublikamızda 1993-cü ildən etibarən hər il 1 oktyabr –  “Beynəlxalq Ahıllar Günü” kimi qeyd olunduğunu diqqətə çatdırdı. Gülnaz İsrafilova 2001-ci ildə "Ahıllara sosial xidmət haqqında" Azərbaycan Respublikasının Qanununun qəbul edildiyini nəzərə çatdıraraq, dövlət tərəfindən ahılların sosial durumunun diqqət mərkəzində saxlanıldığını, daim onların problemlərinin aradan qaldırılması istiqamətində müvafiq tədbirlər görüldüyünü qeyd etdi.
Tədbirdə iştirak edən Rayon Ağsaqqallar Şurasının sədri Mayıl Əliyev və Rayon Veteranlar Şurasının sədri Yəhya Ağayev öz çıxışlarında dövlət rəhbərliyinə ahıllara göstərilən diqqət və qayğıya görə öz minnətdarlıqlarını bildirərək, bir daha ahılları bayram münasibətilə təbrik etdilər.
Sonra ahıllar və veteranlar arasında stolüstü oyunlar (nərd, dama və şahmat) üzrə yarışlar keçirilmiş, yarışların qalibləri və iştirakçıları mükafatlandırılmışdır.