Otuz illik həsrətimiz sona çatır

Otuz ildir hər sabahımızı “Nə zaman Qarabağ yağı düşməndən azad olacaq?”  “Nə zaman Azərbaycan xalqı sülh, əminamanlıq, şəraitində yaşayacaq? Nə zaman Şuşaya, Xankəndiyə yenidən qayıdacağıq?” cavabsız qalan suallar ilə açdıq. Otuz  il səbr etdik bəlkə yağı düşmən torpaqlarımızdan sakit şəkildə əl çəkib gedər deyə. Amma olmadı! İllərdi torpaqlarımızın sülh yolu ilə azad olması, qan tökülməməsi, analarımızın  gözü yaşlı qalmaması üçün çalışsaq da erməni azğınları torpaqlarımızdan murdar ayaqlarını sülh yolu ilə çəkmədi.
Minsk qrupunun vasitəçiliyi ilə iki ölkə arasında razılaşdırılmış əsas prinsiplərdən  birində deyilir ki, “işğal olunmuş Azərbaycana əraziləri; Dağlıq Qarabağın ərazisi və qədim Azərbaycan şəhəri olan Şuşanın ərazisi azad olmalı, qaçqın və məcburi köçkünlər işğal olunmuş bütün ərazilərə qayıtmalıdırlardır”. Ali Baş Komandan İlham Əliyevin dediyi kimi “Minsk qrupu 30 il ərzində heç bir nəticə əldə etmədi”.
Zaman yetişdi, Azərbaycan xalqı itirilmiş torpaqlarını igid oğullarının qanı bahasına qaytarmaq məcburiyyətində qaldı. Artıq  üç şəhərimiz Cəbrayıl, Füzuli və Zəngilan işğaldan azad olunub. Hər gün bir neçə kəndimizin düşmən tapdağından azad olması sevincini göz yaşları içərisində qarşılayırıq.
Azərbaycan xalqı qan tökülməməsi üçün hər bir şansdan istifadə etməyə çalışır. Dövlət başçımız Ali Baş Komandan İlham Əliyev Rusiyanın təklifi ilə iki dəfə humanitar atəşkəs razılığına gəldi. Lakin birinci və ikinci humanitar atəşkəsin pozulmasının səbəbkarı Ermənistan oldu. Atəşkəs qüvvəyə mindikdən 2 dəqiqə sonra Ermənistan atəşkəsi pozdu, onlar yenə də dinc şəhərlərə hücum etdilər, bir gün ərzində  Tərtər şəhərinə 100-dən çox raket atildi. Ermənistan ərazisindən Azərbaycanın ikinci ən böyük şəhəri Gəncəyə ballistik raketlə hücum edildi, dinc əhali öldürüldü.
Cənab Prezident İlham Əliyev Yaponiyanın “Nikkei” qəzetinə müsahibəsində Gəncə hadisəsi ilə bağlı fikrini sərt şəkildə bilidrərək “Bu hərbi cinayətdir və Ermənistan hökuməti buna görə məsuliyyət daşıyacaq” demişdir. Azərbaycan höküməti bu gün də atəşkəs razılığına gəlməyə hazırdır. Bu şərtlə ki, “Ermənistan yeddi rayonu boşaltmağa öhdəlik götürməlidir!”. Torpaqlar sülh yolu ilə qaytarılarsa ermənilərin təhlükəsizliyi, hüquqları Azərbaycanın digər insanlarının hüquqları kimi tam təmin olunacaq. Baxmayaraq ki, 1990-cı illərin əvvəlində ermənilər etnik təmizləmə həyata keçirərək 40 mindən çox azərbaycanlı yaşayan Dağlıq Qarabağda, əsasən Şuşada, Xankəndidə, soyqırım törətdikləri Xocalı şəhərində və bir çox başqa şəhərlərdə insanları öldürdülər.  Bu  gün azərbaycan əsgəri torpağını qanı bahasına düşməndən azad  etsə də, onlar dinc əhaliyə silah tutmurlar, onları öldürmürlər.
Cənab Prezident İlham Əliyevin böyük idarəçilik təcrübəsi var. O dahi şəxsiyyət, ümummilli lider Heydər Əliyevin həyat və siyasət məktəbinin yetirməsidir.  2003-cü il oktyabrın 1-də dahi rəhbərimiz Azərbaycan xalqına müraciətində İlham Əliyevi nəzərdə tutub demişdi: "Mən ona özüm qədər inanıram və gələcəyinə böyük ümidlər bəsləyirəm. İnanıram ki, mənim axıra çatdıra bilmədiyim taleyüklü məsələləri xalqın köməyi və dəstəyi ilə İlham Əliyev başa çatdıra biləcək". Bəli, o gün, bu gündur. Ölkənin əksər Siyasi partiyaları işğal olunmuş ərazilərin qaytarılması ilə bağlı Ali Baş Komandanın yürütdüyü siyasəti tam dəstəkləyir və onun ətrafında sıx birləşiblər.
Azərbaycan Prezidentinin siyasi kursunun ən başlıca istiqamətlərindən biri məhz ordunun hərbi qüdrətinin artırılmasıdır. Məqsədyönlü dövlət siyasətinin nəticəsidir ki, bizim ordu bu gün regionun ən qüdrətli ordusudur və qarşısında dayanan tarixi vəzifəni – torpaqlarımızın ərazi bütövlüyünü təmin etməyə tam qadirdir. Bu günun Azərbaycan əsgəri  30 ildir Vətən sevgisi, Qarabağ həsrəti ilə böyüdü. Ermənilərin “cəsur ordusu” haqqında bütün mifləri, sadəcə ağ yalan idi. Döyüş meydanında onlara kimin kim olduğunu göstərdik. Onların ordusu qaçır. Azərbaycan ordusu onları məğlub edir.
Cənab Prezidentin söylədiyi kimi “2 milyondan az əhalisi olan Ermənistan məntiqli olmadığı təqdirdə, işğala son qoymadığı təqdirdə burada 10 il, 20 il, 50 ildən sonra necə yaşayacaqları haqqında düşünməlidirlər?!”  

Ruhəngiz Heydərova
238 nömrəli tam orta məktəbin müəllimi