Bu gün hər bir vətəndaşımız qürur və fəxarət hissləri ilə yaşayır

Bəli, bu günlər hər bir vətəndaşımız  qürur və fəxarət hissləri ilə yaşayır.

30 ildən artıq  erməni işğalına və təcavüzünə  məruz qalmış, mənfur  düşmənin tapdağı altında inləyən cənnət Qarabağımız  dövlətimizin  başçısı, Ali Baş Komandan cənab İlham Əliyevin məqsədyönlü siyasəti və cəsarətli komandanlığı, yenilməz və mətin Ordumuzun qəhrəman, vətənpərvər, qeyrətli əsgər və zabitlərinin şücaəti sayəsində işğaldan azad olundu!

30 illik ədalətsizliyə 44 gün ərzində tutarlı cavab verildi və son qoyuldu!

Yaşa qəhrəman xalqım! Var ol, doğma yurdum, candan əziz  vətənim! Zəfərin mübarək Azərbaycanım! Sən sınmadın, əyilmədin, çünki bilirdin, əmin idin ki, övladların səni darda  qoymayacaq! Suyunla, havanla, çörəyinlə böyüyən igidlərin yolunda canlarından, qanlarından belə keçəcəklər.

Azərbaycan xalqı səbirli, dözümlü olduğu qədər də mətindir, iradəlidir. Dövlət başçımız da, xalqımız da bu münaqişənin dinc yolla həlli üçün kifayət qədər təmkin nümayiş etdirsə də, düşmən tərəf bunu layiqincə dəyərləndirə bilmədi və təcavüzkar siyasətindən,  təxribatlarından  əl çəkmədi. Belə olan halda isə, hərb yolu qaçılmaz oldu.

Ali Baş Komandanımız cənab İlham Əliyevin  əmrini gözləyən Müzəffər Ordumuz düşmən üzərinə şərəf və ləyaqətlə getdi, döyüş meydanına aslan kimi atıldı. 44 gün davam edən vətən müharibəsinin hər günü tariximizə şanlı səhifələr yazdı. Yüksək amallarla döyüşən əsgər və zabitlərimiz  hər gün yeni şəhərləri, kəndləri, qəsəbələri  düşmənlərdən  azad  etdi, yüksəkliklərdə  misli  görünməyən  rəşadət  göstərirdilər. Tarixi ədalətin bərqərar olması üçün inamla  irəlilədi.

Düşmən ordusunda on min fərari olduğu halda, hörmətli dövlət başçımızın  fəxrlə vurğuladığı kimi, Azərbaycan Ordusunda bir nəfər  də olsun fərari olmadı. Əksinə, ağır yaralanaraq, hospitallara yerləşdirilən əsgərlərimiz  müalicələrini sona çatdırmadan yenidən  döyüşlərə qatıldılar. Düşmən tərəfin hərbi texnikasını, silah-sursat anbarlarını, raket və hərbi qurğularını  məhv etdilər, döyüş meydanında əfsanəvi qəhrəmanlıqlar göstərdilər. 

Həmin günlərdə xalq  dövlətimizin, Prezidentimizin ətrafında bir yumruq  kimi birləşmişdi! Dəmir yumruq kimi! Biz  yenilməz  millət  olaraq,  gücümüzü, birliyimizi bütün dünyaya bəyan etdik və bu birlik   öz  nəticəsini verdi.

İndi cənnət Qarabağımızın  dilbər guşələrində – Ağdamda, Füzulidə,  Cəbrayılda, Qubadlıda,  Zəngilanda, Kəlbəcərdə, Şuşada müqəddəs üçrəngli bayrağımız vüqarla  dalğalanır.

Möhtəşəm qələbəmizin təntənəsi olaraq, dövlət başçımız cənab İlham Əliyevin təşəbbüsü ilə 2020-ci il 10 dekabr tarixində Azadlıq Meydanında Zəfər paradı keçirildi.

Paradda 3000 nəfərdən çox şəxsi heyət, 150-dək hərbi texnika, silahlanmaya yeni qəbul edilmiş müasir hərbi texnika, raket və artilleriya qurğuları, hava hücumundan müdafiə sistemləri, eləcə də, hərbi gəmi  və katerlər iştirak edirdi. Bununla yanaşı, müharibə zamani Azərbaycan Ordusunun darmadağın edərək düşməndən ələ keçirdiyi hərbi qənimətlərin bir qismi də nümayiş etdirilirdi.

Müharibənin ilk günlərindən Azərbaycan xalqı hörmətli cümhurbaşqanı cənab Rəcəb Tayyib Ərdoğan başda olmaqla qardaş Türkiyənin siyasi və mənəvi dəstəyini hiss etmişdir ki, bu da öz növbəsində hər bir Azərbaycan vətəndaşını sevindirmiş, qürurlandırmışdır.

İndi artıq ölkəmiz üçün yeni quruculuq dövrü başlayır. Təcavüzkar düşmənin yerlə yeksan etdiyi, tarixi abidələr, məscidlər, məzarlıqlar və s. Dövlətimiz tərəfindən yenidən bərpa ediləcək. Hər zaman vətəndaşının yanında olan Azərbaycan dövləti bu yolda da inamlı addımlarını atacaq və mənəvi zənginliyini bir daha sübuta yetirəcək. Hər birimiz vətəndaş olaraq üzərimizə düşən vəzifələri dərk edəcək, dövlətimizi yekdilliklə dəstəkləyəcəyik. Bu, həm də bizə bu qələbəni, bu qürurlu hissləri yaşadan müqəddəs şəhidlərimizin ruhu qarşısında mənəvi borcumuzdur.

Torpaqlarımız və ərazi bütövlüyümüz uğrunda canından keçən bütün şəhidlərimizin ruhu qarşısında baş əyir, əziz xatirələrini daim uca tuturuq və tutacağıq.

Döyüş zamani sağlamlıqlarını itirmiş qazilərimizə, yaralılarımıza şəfalar diləyirik.

Yaşasın Azərbaycan! Yaşasın Azərbaycan xalqı! Qarabağ Azərbaycandır!