Nizami Rayon İcra Hakimiyyətinin başçısı sakinlərlə növbəti səyyar qəbul keçirib

14 yanvar 2026-cı il tarixində Nizami Rayon İcra Hakimiyyətinin başçısı Coşqun Cəbrayılov yanvar ayı üçün təsdiq olunmuş qrafikə uyğun olaraq Özbəkistan küçəsi 3 ünvanında yerləşən 12 nömrəli tam orta məktəbdə sakinlərlə növbəti səyyar qəbul keçirib.

Səyyar qəbulda Rayon İcra Hakimiyyəti başçısı aparatının məsul işçiləri, sahə inzibati ərazi dairəsi üzrə nümayəndələr, eləcə də rayonun idarə, müəssisə və xidmət sahələrinin rəhbərləri iştirak ediblər.

Rayon İcra Hakimiyyəti tərəfindən keçirilən səyyar qəbulların əsas məqsədi vətəndaşların mövcud problemlərini yerində dinləmək, müraciətlərin daha operativ və səmərəli şəkildə həllinə nail olmaqdır. Belə görüşlər sakinlərlə birbaşa ünsiyyətin qurulmasına, onların mövcud sosial, məişət və infrastruktur problemlərinin özlərindən öyrənilərək həllinə yönəlmiş tədbirlərin daha səmərəli həyata keçirilməsinə imkan yaradır. Səyyar qəbullar, eyni zamanda, vətəndaş məmnunluğunun yüksəldilməsinə və dövlət qurumları ilə vətəndaş münasibətlərinin daha etibarlı əsaslar üzərində qurulmasına xidmət edir.

Qəbulda rayon sakinlərinin müxtəlif sahələrə dair müraciətləri dinlənilib, qeydiyyat aparılıb, bir sıra müraciətlərdə əksini tapan məsələlər yerindəcə həll edilib, vətəndaşları narahat edən digər məsələlərlə bağlı verilən suallar isə ətraflı cavablandırılıb.

Rayon İcra Hakimiyyətinin başçısı həlli əlavə araşdırma tələb edən problemlərin qısa zamanda aradan qaldırılması ilə bağlı müvafiq tapşırıqlar verib və onların həlli nəzarətə götürülüb.