Nizami rayonunda ətraf mühitin yaxşılaşdırılması xüsusi diqqət mərkəzindədir

Nizami rayonunda ətraf mühitin mühafizəsi və ekoloji vəziyyətin daha da yaxşılaşdırılması istiqamətində müxtəlif tədbirlər həyata keçirilir, iməciliklər təşkil olunur, geniş abadlaşdırma işləri görülür.

Belə ki, kommunal xidmətlərin əməkdaşları tərəfindən mütəmadi olaraq rayonun ərazisi məişət tullantılarından, alaq otlarından təmizlənir, binaların fasadları, yol kənarlarındakı məhəccərlər, məhəllələrdə, parklarda oturacaqlar, ağacların üzərilərində toplanan toz və torpaq mütəmadi yuyulur, yaşıllıq sahələrinə aqrotexniki qulluq göstərilir, qurumuş ağaclar ərazilərdən götürülür.

Eyni zamanda, "Yaşıl dünya naminə həmrəylik ili" çərçivəsində rayon ərazisində yaşıllıqların salınması da davam etdirilir, müxtəlif növ ağaclar, bəzək kolları, mövsümi güllər əkilir, ot örtükləri yenilənir.

Bundan əlavə, rayon ərazisində yaşıllıqların vəziyyəti ilə bağlı keçirilən monitorinqlər zamanı müəyyən olunmuş köküstü quru, qəzalı, xəstəliklərə yoluxmuş ağacların aidiyyəti qurum tərəfindən verilmiş müvafiq rəylər əsasında götürülməsi də həyata keçirilir. Belə ki, Babək prospekti 89 ünvanında qurumuş və xəstəliyə yoluxmuş ağac və kollar götürülmüş, yerində 20 şam ağacı əkilmişdir. 

Qeyd edək ki, rayon ərazisində təmizlik işlərinin aparılması, yaşıllıqların salınması, mövcud yaşıllıqlara qulluq göstərilməsi məsələsi daim nəzarətdə saxlanılır.